Daithí Adams: On the boards again
LE GEARÓID Ó CAIREALLÁIN
Scáil an Ghunnadóra
Le Seán O'Casey
Aisling Ghéar comhlacht amharclainne
17 mbliana a chaith Daithí Adams faoi ghlas as a ról sa sracadh i
gcoinne arm agus Rialtas na Breataine.
Thug an taithí is an cúlra seo léargas ar leith dó agus é ag
glacadh páirte sa dráma iontach úd Dialann Ocrais, dráma faoi
stailc ocrais na Ceise Fada.
ois tá Daithí ar ais ar an stáitse, an iarraidh seo ag glacadh
príomhról i leagan Gaeilge de mhórdhráma Sean O'Casey, `Shadow of
a Gunman.'
Déanfaidh an compántas drámaíochta Aisling Ghéar `Scáil an
Ghunnadóra' a léiriú sa Pavilion Theatre i nDún Laoghaoire ón
15-17 Feabhra, I dTaibhdhearc na Gaillimhe 21-24 Feabhra agus i
gCultúrlann Bhéal Feirste ón 26 Feabhra go 3 Márta.
Seo an dara huair ag Daithí Adams a bheith ar stáitse le hAisling
Ghéar ó ligeadh saor ón Cheis Fhada é i mí Iúil seo caite, duine
de na cimí deireanacha a ligeadh amach mar chuid de Chomhaontú
Aoine an Chnéasta.
``Níor shamhlaigh mé riamh go mbeinn thuas ar an ardán,'' arsa
Daithí. ``Is dúshlán mór é an aisteoireacht agus is diaidh ar
ndiaidh atá mé ag foghlaim na scileanna atá de dhíth orm. Tháinig
Aisling Ghéar chugam sé mhí ó shin agus d'iarr siad orm páirt a
ghlacadh i léiriú `Dialann Ocrais', dráma faoi stailc ocrais na
Ceise Fada agus bás na stailceoirí sna Blocanna H.
``Ba leisc liom dul i dtreo na haisteoireachta ach mhothaigh mé
dualgas orm bheith páirteach sa dráma seo, dráma a léirigh ar
bhealach ar leith an méid a d'fhulaing lucht pluide agus na
stailceoirí ocrais.
``Bhí mé féin ar an phlúid am na stailce ocrais. Thóg sé cuid
mhaith asam, ar leibhéal fisiciúil ach go háirithe ó thaobh na
mothúchán de. Bhí sé iontach crua a bheith ag maireachtáil as an
úr na laethanta úafásacha sin agus bás na stailceoirí ocrais. Ach
bhí lán tí againn beagnach gach áit a ndeachaigh muid agus
chuaigh an dráma i bhfeidhm ar dhaoine.''
Lena íníon óg féin chonaic sé go raibh an t-aos óg ar bís chun
eolas a
bheith acu faoin stailc ocrais agus faoin tionchar a bhí aige ar
an phobal
náisiúnach an t-am sin.
``Ba é sin an rud is mó a mhothaigh mé faoi Dialann Ocrais'' arsa
Daithí.''Gach áit a ndeachaigh muid bhí slua mór daoine óga ann ag
iarraidh fáil amach faoin tréimhse sin. Tá tionchar na stailce
ocrais le mothú ní amháin sa ghlúin s'agamsa ach sna glúnta atá
ag fás aníos anois.''
D'éirigh thar barr le Dialann Ocrais a léirigh Aisling Ghéar i
nGaillimh, i nDoire, i dTír Eoghain, ar an Iúr agus i m Béal
Feirste.
Bhí iomlán tí gach oíche den 10 lá a léiríodh é sa Chultúrlann i
mBéal Feirste.
Tá dúshlán de shaghas eile i gceist anois ag Daithí ina ról nua
mar Séamas Ó Siadhail i ndráma O'Casey `Scáil an Ghunnadóra.'
Ach beidh faill ag léitheoirí An Phoblacht a dtuairim féin a
thabhairt faoi sin má théann siad lena fheiceáil sa Pavilion, sa
Taibhdhearc, nó sa Chultúrlann.
Maidir le cúrsaí polaitiúla tá Daithí muiníneach go bhfuil
gluaiseacht na Poblachta sa treo ceart.
``Tá mé muiníneach as an cheannaireacht'' ar seisean. ``Bhí a mbunús
acu ann ón tús iad féin agus tuigeann siad an scéal. Tá mé
dóchasach go mbainfimid ár n-aidhmeanna amach.''
Gach eolas faoin dráma seo ó Bhéal Feirste (90) 208040.
![[An Phoblacht]](http://republican-news.org/graphics/title_gifs/aprn.gif)