Mol an óige agus Tiocfaidh sí
Níl aon dabht ná go raibh fearg ar leith ar na Gardaí an
tseachtain seo chuaigh thart nuair a d'ionsaigh siad ar bhaill de
Shinn Féin Youth ina dhiaidh Chomhdháil SFY i mBaile Átha Cliath.
Níl aon amhras ach an oiread ná go raibh SFY `ciontach' as na
Gardaí a chur le cuthach. Cén fath eile a d'eagródh na Gardaí
luíochán do na hóganaigh agus go mbualfaidís ar na príosúnaigh ar
ar ghabh siad? `Sea, ciontach. Tá Sinn Féin Youth ró-fhorleathan,
ró-cháiliúil, ró-eagraithe do na Gardaí agus dar le meon
smachtach an stait seo, an rud nach bhfuil faoi smacht an Gharda
is bagairt é, agus tá an duine nó na daoine atá taobh thiar den
leithéid de bhagairt ag gríosadh freagra na láimhe laidre ó na
Gardaí. Tá sé chomh shimplí sin.
Tá stair na bPoblachtánach Óg seo, baill anois de SFY, breactha
go leor. Is iomaí uair roimhe seo gur theip ar an Ghluaiseacht an
spas cuí agus an tacaíocht ba cheart a thabhairt d'óg
ghluaiseachtaí a bhí ag iarraidh bheith páirteach - ar a gconlán
féin - sa tsreachailt pholaitiúil. Go deimhin, ba mhinice an
Ghluaiseacht a tachtadh in áit a chothú, bíodh sé sin de thaisme
nó d'aon ghnó. Ceapfaí `stiúrthóirí' agus `úrlabhraithe' don
`éite óg' ach má a ceapadh, ní minic a bheidís in inmhe glór na
ndaoine óga a chluinsint nó a thuiscint i gceart. Déanta na
fírinne, ba mhór an bac é seo ná an chabhair nó ní raibh caoi á
thabhairt don óige a mbealach féin a aimsiú agus a gcomhairle
féin a chluinsint.. go dtí anois.
Ón bhliain seo chuaigh thart amach, ó thosaigh dream óganaigh
arna n-eagrú féin faoi theideal Sinn Féin Youth, is léir go
bhfuil chuile rud athraithe agus athraithe ina iomlán. B'iontach
an beart é dá mb'fhéidir le grúpaí eile, istigh Sinn Féin, sampla
na hÓige a leanúint. Dá mbeadh, bheadh na mná eagraithe i gceart,
bheadh na Gaeil eagraithe i gceart, agus bheadh an eagraíocht ina
iomlán i bhfad níos laidre, níos saibhre as mar pháirtí.
D'éirigh go maith leis cuid is mó de na himeachtaí a d'eagraigh
an grúpa ó cuireadh ar bhun iad. Ar ndóigh cuimhneofar an liosta
cainteoirí a labhair mar bhaill de SFY ag Ard Fheiseanna na
bliana seo. Taobh le sin, shínigh Sinn Féin Youth amach i dtreo
páirtithe agus grúpaí eile, in Éireann agus thar lear. D'éirigh
leo bheith páirteach i gcainteanna le haondachtóirí agus
dílseoirí araon ag seiminéar i nGleann Crí agus tá nascanna
cruthaithe, a mhaireas, idir SFY agus Jarrai, ógGhluaiseacht na
mBascach. Agus tá an focas go léir sna teagmhálacha seo dírithe
ar theachtaireacht Shinn Féin a chraobhscaoileadh.
Le bliain anois, ní bhíonn aon imeacht phoblachtanach ann nach
mbíonn úrlabhraí SFY ar an liosta cainteoirí ar an bhonn céanna
leis na cainteoirí eile. In eagrú imeachtaí, bíonn áiteanna sa
tír ag brath, anois, ar SFY le cabhair a thabhairt don eagrú. Ó
cuireadh atheagrú ar an fheachtas Saoirse bíonn SFY fite fuaite
le slógaidh, le himeachtaí poiblíocht, agus leis na
gníomhaíochtaí níos dushlánacha mar seilbh a ghlacadh ar dhíon an
Waterfront nó Halla na Cathrach, Bhéal Feirste.
Agus ní raibh imeachtaí SFY teorannta don Sé Chontae. Go deimhin,
is gluaiseacht í i measc na hÓige i mBaile Átha Cliath chomh
maith agus bíonn imeachtaí SFY sna coláistí, scoileanna, ar na
sráideanna, ag cruinnithe poiblí, trí cúrsaí oideachas do dhaoine
óga agus le daoine óga. Ní nach ionadh, mar sin, go bhfuil imní
ar ghardaí an stait seo nó feiceann siad an t-athrú ag teacht
chucu agus mar choimeadaithe chuile áit tá siad ag iarraidh stop
a chuir leis an athrú sin. Ach tá sé ró-mhall, ró-mhall monuar
agus níl SFY ar tí imeachta.
Níor chóir, áfach, go mbeadh SFY fagtha ar a aonar lena gcearta
féin mar ghrúpa pholaitiúil a chosaint. Tá dualgas ar
dhaonlathaigh ciapadh leanúnach an Gharda Síochána ar bhaill agus
ghníomhaithe Shinn Féin Youth i mBaile Átha Chliath a cháineadh.
Ó cuireadh tús leis an eagraíocht i mBaile Átha Cliath tá lámh
láidir an Gharda Síochána ag luí orthu. Bíonn Gardaí ag fanacht
taobh amuigh tithe baill de SFY, ag tabhairt cuairte ar a
dtuismitheoirí, ag faire agus ag breacadh síos ainmneacha de
dhaoine óga a fhreastalann ar chruinnithe nó himeachtaí SFY.
Caithfear an ciapadh a stopadh agus a stopadh anois. Ar ndóigh
caithfear admháil gur comhartha agus cruthúnas é, an feighlí
polaitiúil leanúnach seo, go bhfuil ag éirí le Sinn Féin Youth.
Murach sin, ní bheadh spéis dá laghad ag an Gharda iontu. Ach
má's moladh ann féin é sin, tá sin in am anois stop a chur leis
an moladh agus ligint don Óige teacht.
Glacann eaglaiseach seasamh náisiúnaíoch
Tamall ó shin chuir Joe Duffy agallamh ar Raidió 1 ar dhuine de
na hagóideoirí Oráisteacha i nDroim Crí. Bhí sé thar a bheith
spéisiúil. Mheas an fear seo go raibh an Vatacáin taobh thiar de
gach a raibh ag tarlú ar domhan. Luaigh sé trioblóidí an
Uachtaráin Clinton ach go háirithe. Dar leis go raibh na
cairdinéil sa Róimh taobh thiar de Monica Lewinsky. Eagraíodh an
céapar ar fad, más fíor dó, toisc gur dea-Bhaisteach é William
Jefferson seo againne!
Níl an mhuinín chéanna agam i gcumas na hEaglaise Caitlicí i
reachtáil an domhain is atá ag ár gcomhshaoránach Oráisteach ach
tá meas mór agam ar ghéarchúis an aos eaglaise nuair a bhíonn
straitéis pholaitiúil fhadtéarmach i gceist. Bhí an ghéarchúis
sin le brath in óráid a thug príomháidh Caitliceach na hAlban, an
Cairdinéal Thomas Winning, sa Bhruiséil le déanaí.
Bhí an Cairdinéal ag cur na cosa de faoi ``a new Scotland in a new
Europe'' nath a bhfuil macalla ann de pholasaí Pháirtí Náisiúnta
na hAlban, Albain neamhspleách taobh istigh de AE. Mar is eol do
mo léitheoirí rialta tá an colúnaí seo suite de go bhfuil
neamhspleáchas na hAlban dosheachanta, inmhianta agus
riachtanach. Má tá an Dr Winning ar son neamhspleáchais - agus
sin mo léamh ar a óráid - fáiltím roimhe ar bord.
Thagair an cairdinéal do ``rebirth of ancient nationhood in a
cradle of modern democracy.'' Lean sé leis: ``An age-old yet new
nation is taking its place once more in the world stage with its
legal system, democratic institutions, respect for human rights,
educational facilities and all the rest already in place.''
D'fhéadfá go leor a rá faoi chaint an chairdinéil. Is cosúil
nach bhfaigheann sé locht ar bith ar an déanamh impiriúlach arb é
AE é. Ansin, más fearr é córas dlí na hAlban ar mhionbhealaí ná
an córas i Sasana is córas aicmeach agus stálaithe é ar ceart a
athrú ó bhonn agus ní ceart a bheith maoithneach faoi. Agus
nuair a thosaíonn easpag ag moladh áiseanna oideachais tá sé in
am a bheith aireach.
Is de bhunadh Éireannach iad an chuid is mó de thréad an
Chairdinéil Winning cé go bhfuil pobal Caitliceach de
Ghaeilgeoirí dúchasacha i ndeisceart Inse Gall. Cleachtaíodh an
prionsabal ``Cuius regio eius religio'' in Albain tráth an
Reifirméisin. Ghlac na daoine a reiligiún óna dtiarna nó óna
gceann feadhna. Sin an fáth go bhfuil an Ghaeltacht ansin roinnte
idir ceantair Chaitliceacha agus ceantair Phrotastúnacha.
D'fhulaing pobal Caitliceach na hAlban formad seicteach i ngach
gné den saol anuas go dtí an lá inniu. Chuir iompórtáil an
Oráisteachais ó Éirinn san aois seo caite nimh nua sa
dú-Phrotastúnachas dúchasach. Faoi dheireadh tá an seicteachas
sin ag maolú. De dheasca an tseicteachais bhí ding curtha idir
na Caitlicigh agus cuid mhór eile de phobal na hAlban agus
b'fhéidir go raibh doicheall áirithe orthu páirt iomlán a
ghlacadh sa náisiún Albanach. Níl call lena leithéid de
dhoicheall agus sa chomhthéacs sin tá tábhacht ar leith le hóráid
an Chairdinéil Winning.
Imríodh an cárta ``divida et impera'' in Albain arís agus arís
eile. Níl sa deighilt sheicteach ach cuid den scéal. Is mó fós
an dochar atá déanta leis an deighilt idir tuaisceart agus
deisceart sa tír sin. Ar feadh na gcianta bhí an dá dhream in
adharca lena chéile, rud a chuir bac le forás an náisiúin.
Toradh tubaisteach amháin ar an deighilt sin is ea go mbraitear
gur teanga í an Ghaidhlig a bhaineann leis na hoileáin agus na
Garbhchríocha amháin agus nach n-aithnítear coitianta í fós mar
chuid dhílis de dhúchas an náisiúin uile.
Tá clár gnó fada roimh mhuintir na hAlban. Ar bharr an chláir tá
neamhspleáchas náisiúnta agus ní rófhada ón mbarr atá díothú an
tseicteachais.
![[An Phoblacht]](http://republican-news.org/graphics/title_gifs/aprn.gif)