Taibhse nach ndíothófar go héasca
Níos luaithe i mbliana tháinig dornán sóisialaithe ó
bPortaingéil, ón Danmhairg agus ón Isiltír le chéile sa Bhruiséil
d'fhonn iris Bhéarla nua a bhunú le teachtaireacht na heite clé a
scaipeadh ar scála Eorpach.
Tá an chéad eagrán den iris tagtha ar aon saol anois. Spectre is
teideal di. (``Tá an Eoraip á taithiú ag taibhse...'' ``A spectre is
hauting Europe...'' Geddit?)
Ar na scríbhneoirí sa chéad eagrán tá an drámadóir Harold Pinter
(a ghlac páirt mar aisteoir i séasúr dá chuid drámaí in
Amharclann an Gheata, Baile Atha Cliath, le déanaí) agus é ag cur
síos ar chumhacht na Stát Aontaithe. Cíorann Ken Livingstone FP
polasaí Pháirtí Lucht OIbre na Beataine faoin Aontas Eorpach.
Scríobhann iriseoir Eimineach/Yemani, Mohamed Bensaada, faoin
Ailgéir (agus faoi mar atá drochtionchar ag polasaithe an AE sa
tír sin) agus pléann cherllyn Humphreys forleathnú Eagraíocht
Chonradh an Atlantaigh Thuaidh/NATO in oirthear na hEorpa.
Tá agallamh ann le Jan Marijinissen, feisire parlaiminte
sóisialach san Isiltír. Ar na hábhair eile faoi chaibidil in
Spectre tá polasaithe impair an AE, tionchar na trádála
idirnáisiúnta ar mhná, an t-aireagra nua atá beartaithe (an
tEora), an rialtas nua sa Bhreatain agus an staid ph0olaitiúil sa
Pholainn.
Cuirtear Spectre i gcló i gclólann Phairtí Sóisialach na
hIsiltíre in Rotterdam. Tá inchur ann freisin ó Pháirtí Cumannach
na Portaingéile, Comhaontas Dearg-Glas na Danmhairge agus Páirtí
Clé Radacach na Polainne chomh maith le heagraíochtaí comhshaoil
agus comhdhlúthaíochta.
Tá níos mó ná ardán tuairimíochta i gceist ag Spectre. Glacann sé
seasamh an-chinnte faoi chúrsaí an Aontais Eorpaigh. Tá an
seasamh sin spéisiúil ó tá lucht eagarthóireachta na hirise ina
gcónaí agus ag obair i gcroílár na hollphéiste sa Bhruiséil.
Feictear dóibh gur club rachmasóirí é an AE.
Deir Eagarthóir Spectre, Steve Griffin: ``The idea that you could
somehow go along with Euro-federalism on the ground that it would
lead inexorably to a United Socialist States of Europe is so
utterly misguided it's hard to believe that anyone, let alone
experienced politicians could ever take it seriously.''
Reachtáltar an AE ar mhaithe le corporáidí ilnáisiúnta agus
daoine atá faoina gcumaoin, dar le Spectre. Cuireann an iris in
éadan aontas airgeadaíochta mar nach mbeadh de thoradh air sin
ach dífhostaíocht ar an mórchóir, lárnú ar mhaoin agus ar
chumhacht i limistéir ar leith agus bearna níos mó fós idir
saibhir agus daibhir. Scriosfaí córais leasa shóisialaigh agus
beadh ciorruithe in earnála mar chórais taistil phoiblí, cúrsaí
oideachais agus na healaíona.
Deir Spectre go bhfágfadh aontas airgeadaícohta níos mó cumhachta
i lámha gasra neamhthofa de bhaincéirí ná mar a bheadh ag aon
chomhlacht tofa.
Iris 32 leathananch í Spectre atá ar fáil ar GB£2 (postas san
áireamh) ó Spectre Magazine, PB5, BXL 46, rue Belliard 79-113,
1047 An Bruiséil. Foilseofar é trí huaire sa bhliain. Tá sé
lándaithe agus curtha amach go snasta agus - sonas air! - saor ón
gnáthbhéarlagair tuirsiúil a bhíonn ina smál ar fhoilseacháin den
eite chlé.
Colm de Faoite
Céim ar aghaidh sa tSrath Bháin
LE EOGHAN MacCORMAIC
Don chéad uair riamh beidh focail Ghaeilge le feiceáil amach
anseo ar armas Bhaile an tSrath Bhain nó ghlac an comhairle
áitiúil le rún an tseachtain seo chuaigh thart ó Chomhairleoir
Ivan Barr, Sinn Féin go mbeadh ainm an bhaile ann trí Ghaeilge
agus trí Bhéarla feasta.
Ach fiú ar mholadh chomh simplí sin bhí easaontas ó na
haontachtóirí, nach féidir glacadh leis na hathraithe móra atá
tar éis teacht ar an suíomh sa chomhairle i ndiaidh blianta fada
de riail na n-aontachtóirí.
Nuair a mhól Ivan Barr a rún - a ghnothaigh tacaíocht ón SDLP,
dhearbhaigh Derek Hussey, UUP, nach dtabharfadh sé tacaíocht don
rún toisc gur `teanga mharbh' í an Ghaeilge. Mar chruthunas ar
seo chuir sé i gcuimhne don chomhairle go bhfuil fórmhór na
gcláracha ar RTÉ i mBéarla. Dearfadh daoine gur dul chun chinn é
go bhfuil aontachtóir ag amharc ar RTÉ in aon chor, ach b'fhéidir
nach fada uainn an lá go mbeidh an comhairleoir ag amharc ar
TnaG, má's é cláracha Gaeilge atá uaidh.
Ní raibh freagra uaidh, áfach, nuair a dúradh leis go raibh mana
an chomhairle, `Concordia Crescit' scríofa i Laidin, teanga atá,
ar ndóigh, rud beag níos mairbhe ná an Ghaeilge. Ar ndóigh, is
fiú cuimhniú go bhfuil mana an UDA scríofa i Laidin chomh maith,
b'fhéidir gur siombal de shaghas éigin é sin, mana i dteanga
mharbh do pholaitíochtaí nach maireann ró-fhada?
Ach tugadh curadh mir na leithscéalta don oíche don chomhairleoir
Emery, UUP, a dúirt nach féidir leis tacaíocht a thabhairt don
rún toisc gur baineadh feidhm as an Ghaeilge i ngraffiti sa
cheantar. An ndiúltóidh sé ó Béarla a labhairt feasta má
fheiceann sé Fuck the Pope scríofa i dteanga na nGall....?
![[An Phoblacht]](http://republican-news.org/graphics/title_gifs/aprn.gif)